Søgan

Á stovnandi fundinum tann 17. december 1952, sum varð hildin á skrivstovuni hjá Trúgva Samuelsen sakførara, vóru møttir: Johannes Berg, Eigil Gunnarson, Kaysten Andreasen, Henry Svenson og Andrew Djurhuus

Samlaður partapeningur var 10.500 kr..

Fyrsti nevndarfundur varð hildin sama dag. Í nevndina komu Kaysten Andreasen, Johannes Berg og Eigil Gunnarson. Til granskoðara var valdur Jákup Jensen.

Nevndin skipaði seg við Eigil Gunnarson sum formanni Johannes Berg sum næstformanni og Kaysten Andreasen nevndarlimi.

Støðin fekk navnið P/F Taxa A/S.

Taxa hevði havt tlf. 450 øll árini. Seinni kom nummar 650 afturat. Tey sum ringdu eftir bili, máttu siga við tey á telefonstøðini, hvørja støð tey ynsktu, annars varð bara umstillað til onkra bilstøð í býnum.

Tá tað frættist í 1957, at automattelefonir vóru á veg, varð umsøkn beinanvegin send inn um telefonnummari 1-2-3-4, og hevur hetta verið partur av telefonnummarinum hjá Auto til dagin í dag.

Nýtt navn – gomul støð

P/F Taxa var ein samanrenning av støðunum Taxa og Bilstøðini í J. C. Svabosgøtu.

Tann 22 Apríl 1955 er ein lýsing í bløðunum:

“Nýtt navn – gomul bilstøð.
Aftaná at hava undirskrivað seming í sakarmálinum við Z. Niclasen, broyta vit navnið á bilstøð okkara P/F Taxa til “AUTO”
Telefonin er óbroytt 1234 . eitt-tvey-trý-fýra.

Telefonboksir

Í 1957  fekk AUTO loyvi at seta upp sokallaðar telefonboksir í Tórshavn.  Ein í Vágsbotni, ein við Eystaruvág og ein á Vaglinum ein í Grønlandi og ein í Bókbindaragøtu . Longu tá kundi borgarin í Havn, bert við at trýsta á ein knøtt, fáa samband við AUTO. “

Nýggjur bygningur

Tann 15 mars 1955 varð avgjørt at taka upp samráðingar við Jens Paula av Reyni um  grundøkið Matr. Nr. 393a.
07. juni 1955 keypti AUTO Mtr. Nr. 393a fyri 20.000 kr. og  28 november 1955 varð byrjað.

Nýggja støðin

Á fundi 03. juli varð samtykt at søkja um lán ímóti veðrætti í ognum felagsins.

Støðin stóð liðug um summari 1956, og sambært lýsing um sama mundi vóru 17 stórir bilar á støðini. Í skrivandi    løtu eru 33 bilar sum koyra frá støðini.

Av tí at Havnará rann ígjøgnum økið, varð ein træbrúgv gjørd fyri at fáa innkoyring frá Niels Finsensgøtu. Ein partur av støðini varð eisini bygdur á hesa brúgv.

Hetta var ein vøkur støð, sum lá og liggur sera væl fyri í býnum.

Á støðini var avgreiðslurúm til teirra sum passaðu telefonina, ein køkur og rúm til bilførararnar.
Eitt  stórt bilhús við grøv, so bilførarar sjálvir høvdu møguleika at umvæla bilar sínar. Eisini var søla av  smyrjiolju og bensini.

Fyrsta málingin sum støðin varð málað við, var gult  við bláum listum við búmerkinum Auto á framsíðuni.

Í 1969 varð gamla støðin tikin niður, og nýggj bygt uppaftur á sama stað.

Auto er fyrst bygda bilstøð í býnum.

Støðin er síðani nútímans gjørd, og soleiðis broytt nakað. Hon  verður viðlíkahildin, og fríðkað verður alsamt um hana .

Tað er við  takksemi og virðing, vit hesa løtu hava leitað aftur í tíðina.

Hetta er ein støð vit øll eiga at verða errin av.