Tórshavn – Flogvøllurin – Tórshavn

Søgan hjá Vága Floghavn

P/f Vága Floghavn er eitt alment partafelag, sum stendur fyri rakstrinum av Vága Floghavn. Tey umleið 30 starvsfólkini virka fyri, at tað skal vera gott og trygt at ferðast um flogvøllin, sum er portrið millum Føroyar og útheimin.

Aðrar týðandi uppgávur eru at virka fyri, at hava ein rakstur á sunnum, handilsligum grundarlagi, útbygging av flogvøllinum og farstøðini, eins og støðug menning av virkseminum annars.

Fyritreytirnar fyri loftvegis sambandinum millum Føroyar og umheimin eru batnaðar nógv ta seinastu tíðina. Í desember 2011, varð flogbreytin longd frá 1250 metrum til 1799 metrar. Longda flogbreytin merkir, at flogvøllurin nú kann taka ímóti nógv størri flogførum enn fyrr. Nýggj innflúgingartól hava eisini bøtt munandi um reglusemið á flogvøllinum.

27. september 2012 undirskrivaðu Vága Floghavn og byggifyritøkan Articon sáttmála um at byggja nýggjan tænastubygning og farstøð. Hetta arbeiðið varð liðugt 17. juni 2014.

Vága Floghavn arbeiðir tætt saman við almennum myndugleikum, saman við føroyskari ferðavinnu og føroyskum vinnulívi annars, til tess at fremja vøkstur umvegis flogvøllin í Vágum.